Hanner Tymor

Ydych chi'n chwilio am ffyrdd o ddifyrru'r rhai bach drwy gydol y gwyliau hanner tymor? Mae Croeso Bae Abertawe yma i ddangos yr holl ddigwyddiadau, gweithgareddau a phrofiadau sydd ar gael i chi ar draws canol y ddinas a'r cyffiniau.

Yn Abertawe, mae digon o weithgareddau addas i deuluoedd wedi'u trefnu drwy gydol y gwyliau hanner tymor. Mae'r gweithgareddau hyn yn cynnwys popeth o weithdai crefftau, cyfleoedd i ddysgu sgiliau newydd, partïon dawnsio, clybiau plant a llawer mwy. Mae'r ddinas hefyd yn cynnig amrywiaeth eang o weithgareddau a phrofiadau, am ddim ac am dâl, sy'n golygu bod rhywbeth at ddant pawb.

Dyma rai o'n gweithgareddau a'n lleoedd gorau i deuluoedd roi cynnig arnynt yn ystod y gwyliau hanner tymor:

Beth am ymweld ag un o'n llyfrgelloedd niferus? Mae 17 ohonynt ar gael ledled y ddinas, felly mae'n siŵr bod un yn agos atoch chi!

Beth am gael blas ar y gorffennol a dysgu am hanes Abertawe yn Amgueddfa Abertawe neu ddarganfod mwy am ein ‘ugly lovely town’ yng Nghanolfan Dylan Thomas?

Mae Atyniadau Awyr Agored Abertawe'n cynnig y cyfle perffaith i archwilio promenâd Abertawe, gyda gweithgareddau'n cwmpasu'r holl bellter rhwng Llyn Cychod Singleton a Gerddi Southend yn y Mwmbwls.

Bydd traethau hyfryd Abertawe'n rhoi digon o leoedd i chi drefnu picnic a gwylio'r byd o'ch cwmpas.

Nid oes rhaid i chi wario llawer o arian chwaith – cymerwch gip ar ein hadran Pethau i'w Gwneud Am Ddim i gael hyd yn oed mwy o syniadau.