Ar ôl i'r Nadolig ddod i ben ac wedi i ni ddathlu'r flwyddyn newydd, gall y diwrnodau byr a'r tywydd oer fod yn heriol, felly mae'n bwysig ein bod yn gofalu am ein hunain.
Gall gweithgarwch corfforol roi hwb i'ch hwyliau a'ch lefelau egni. Mae awyr iach a bod allan ym myd natur bob amser yn donig. Ewch am dro hir yn Abertawe wledig hyfryd, neu beth am gerdded ar hyd llwybr yr arfordir er mwyn cael ychydig o awyr iach?
Gallwch gadw'n heini drwy archwilio'r ardal ar gefn beic - mae gennym filltiroedd o lwybrau beicio i chi eu dilyn ac mae llawer ohonynt yn rhan o'r Lôn Geltaidd a'r Rhwydwaith Beicio Cenedlaethol. Dim beic? Dim problem! Gallwch logi un yma ym Mae Abertawe.
Os oes well gennych gadw'n heini dan do, gallwch roi cynnig ar wal ddringo neu sesiwn taflu bwyeill - efallai y byddwch chi'n dod o hyd i’ch hoff hobi newydd! Cadwch eich meddwl yn effro hefyd drwy roi cynnig ar ystafell ddianc, neu beth am ddysgu rhywbeth newydd ac ymweld ag un o'n horielau neu amgueddfeydd?
Gallwch gael hwyl gyda chrefftau drwy gymryd rhan mewn gweithdy, neu fynd i'r theatr i wylio sioe! Neu, os ydych chi'n teimlo'n egnïol, beth am fynd i ddawnsio mewn bar prysur? Mae cerddoriaeth, chwerthin a symud yn dda i'r enaid!
Arhoswch mewn cysylltiad â theulu a ffrindiau drwy drefnu cyfarfod cost isel mewn parc neu ar y traeth, neu tretiwch eich hun i noson allan fel nad oes angen i chi boeni am goginio! Gallwch ddewis o fwytai ar hyd yr arfordir gyda golygfeydd gwych o'r môr neu dafarnau gwledig clyd gyda thanau boncyffion! Neu beth am flasu'r cynnyrch lleol sydd ar gael ym Marchnad Abertawe, sef marchnad dan do fwyaf Cymru?
