4 Diwrnod Perffaith o Hydref ym Mae Abertawe

Troeon arfordirol, golygfeydd godidog a chyfrinachau lleol i'w darganfod...

Paciwch eich bagiau ac ewch i fwynhau amser arbennig ym Mae Abertawe. O ble i fwyta ac yfed i'r lleoedd gorau i'w harchwilio, dyma'ch arweiniad personol i wneud y mwyaf o'ch arhosiad dros yr hydref.

Diwrnod 1: Archwilio'r Mwmbwls ar Droed

Dechreuwch ar eich antur fechan gyda diwrnod hamddenol ym mhentref hardd y Mwmbwls. Yn y pentref arfordirol hwn, sy'n boblogaidd iawn ymhlith bobl leol, mae golygfeydd godidog o'r môr, castell hanesyddol, rhesi o siopau annibynnol a'r hufen iâ lleol gorau am filltiroedd!

Ydych chi'n chwilio am gofroddion go iawn? Beth am brynu gemwaith, crochenwaith neu baentiadau a wnaed yn lleol, neu lwy garu draddodiadol y gallwch ei thrysori am byth?

Ewch am dro heddychlon ar hyd y promenâd modern, gan wneud eich ffordd i'r pier Fictoraidd. Ewch i’r arcêd ddifyrion o’r oes a fu i wario eich darnau arian cyn i chi fynd tu fas i fwynhau golygfan mwyaf eiconig yr ardal. Yn 128 oed, y pier yw'r lle perffaith i dynnu ffotograffau hydrefol hyfryd o'r môr. Does dim un machlud haul yr un fath!

Diwrnod 2: Dod o hyd i'r ffordd yn Nhirwedd Genedlaethol Gŵyr

Cewch gyfle i gael awyr iach yn un o ardaloedd gorau Gŵyr - Bae Rhosili. Gyda'r gwynt yn eich gwallt a golygfeydd eang, byddwch yn gallu ymlacio o'r eiliad rydych chi'n cyrraedd.

Mae croeso i gŵn ar ein traethau yn ystod yr hydref. Ewch ar daith o amgylch tirweddau ysblennydd Gŵyr, gan fynd drwy fythynnod gwyngalchog Porth Einon i Fae Oxwich (heibio gwelyau cyrs a sawna ar y traeth!) Ewch i le hyfryd arall yng Ngŵyr - Bae y Tri Chlogwyn, lle mae croesi cerrig yn yr afon pan fydd y llanw ar drai i gyd yn rhan o'r profiad.

Mae llwybr yr arfordir o Fae Caswell i Rotherslade yn mynd drwy Fae Langland lle mae syrffwyr lleol yn reidio’r tonnau. Cofiwch edmygu awyr dywyll syfrdanol Gŵyr, mae’n brofiad na fyddwch byth yn ei anghofio!

Diwrnod 3: Diwylliant y Ddinas

Rhowch eich esgidiau cerdded i'r neilltu ac ewch i Abertawe am y diwrnod i ddarganfod diwylliant a hanes y ddinas.

Gwyliwch yr haul yn codi yn y Marina, gyda latte yn eich llaw, wrth sylwi ar y cychod hwylio ar y dŵr. O'r Marina, mae'n hawdd darganfod cysylltiad agos y ddinas â'r awdur a'r bardd o fri rhyngwladol Dylan Thomas, a threftadaeth forwrol Abertawe yn yr amgueddfeydd gerllaw.

Ewch ar fordaith cyn mynd i ddistyllfa Penderyn lle mae hen safle gwaith copr Abertawe wedi cael hwb newydd.

Rhowch gynnig ar bice ar y maen ym marchnad dan do fwyaf Cymru cyn ymuno â phobl leol i fwynhau theatr, cerddoriaeth, digwyddiadau diwylliannol ar draws y ddinas, gan ymgolli yn ysbryd creadigol Abertawe ymhell ar ôl i'r haul fachlud.

Diwrnod 4: Archwilio Byd Natur

Mae digonedd o fywyd gwyllt i arsylwi arno yn Abertawe wledig. Ewch am dro hamddenol wrth sylwi ar liwiau'r hydref neu beth am feicio ar hyd llwybr 43 y Rhwydwaith Beicio Cenedlaethol - ffordd braf o archwilio'r ardal.

Gwisgwch eich esgidiau cerdded ac ewch i ddringo pwynt uchaf Abertawe ym Mhenlle'r Castell; neu ewch i Ddyffryn Lliw i fwynhau golygfeydd o'r mynydd a'r gronfa ddŵr, ac i roi cynnig ar gaiacio (tan ddiwedd mis Medi).

Os ydych chi’n ymweld ag un lle yn unig heddiw, ewch i Goed Cwm Penllergare. Mae'r baradwys hon o Oes Fictoria wedi'i hadfer yn ofalus ac mae dros 12km o lwybrau cerdded drwy goetir, llynnoedd a rhaeadr i chi eu mwynhau. Cadwch lygad am sgrechod y coed lliwgar, ystlumod Daubenton, ffyngau coetir oren trawiadol (Orange Grisette), ac iorwg sy'n darparu ffynhonnell neithdar bwysig i wenyn, pryfed hofran, a phryfed eraill.

O fwyd môr ffres a bwyd stryd blasus yn y Mwmbwls i fwytai o safon a bwydydd deli i ginio ym mhenrhyn Gŵyr, mae Bae Abertawe'n cynnig rhywbeth ar gyfer pob achlysur. Gyda'r bwytai a'r bariau bywiog yng nghanol y ddinas hefyd, yn ogystal â chaffis annibynnol a ffefrynnau traddodiadol yn Abertawe wledig, mae rhywbeth at ddant pawb!

Deffrwch i ganeuon adar yng nghefn gwlad, cwympwch i gysgu i sŵn y môr, neu arhoswch yn agos at lannau bywiog ac atyniadau diwylliannol Abertawe. O fythynnod a thafarnau gwledig i westai steilus, fflatiau a gwersyllfeydd, mae gan Fae Abertawe'r breswylfa berffaith ar gyfer eich antur hydrefol.