Dathlu Sul y Tadau ym Mae Abertawe

#1 Y tad sy'n dwlu ar fwyd

Os yw eich tad yn berchen ar ffwrn pizza, offer coginio o'r radd flaenaf, neu gyllyll dur Japaneaidd, mae'n debygol iawn ei fod yn credu mai pryd o fwyd yw'r anrheg orau ar ddiwedd wythnos brysur.  

Eich anrheg berffaith... 

• Rhowch gyfle iddo fwynhau profiad o fwyty safon Michelin ym mhenrhyn Gŵyr.  

• Os ydych am iddo gael anrheg fwy ymarferol, gallwch ei helpu i fagu sgiliau i greu argraff ar ei ffrindiau drwy drefnu dosbarth coginio mewn cigyddiaeth neu wneud swshi.  

• Beth am annog ei frwdfrydedd drwy guradu basged fwyd foethus unigryw o'r stondinau niferus sy'n llawn cynnyrch Cymreig lleol ym Marchnad Abertawe?   

#2 Y tad sy'n dwlu ar ddiod 

Os yw eich tad yn mynnu cael y gwydryn cywir, y tymheredd perffaith a stori'r brand, yna bydd yn siŵr o werthfawrogi profiad dosbarth meistr.  

Eich anrheg berffaith... 

• Rhowch anrheg annisgwyl iddo drwy drefnu sesiwn flasu fythgofiadwy yn un o fragdai neu ddistyllfeydd Bae Abertawe.  

• O gyrfau crefft blasus, mathau gwahanol o fodca lliwgar a jin botanegol a grëwyd ym mhenrhyn Gŵyr, i wisgis arobryn o Gymru sy'n cael eu distyllu mewn hen waith copr hanesyddol, mae pob cyrchfan yn cynnig blas unigryw ar ddiodydd gorau'r ardal. 

#3 Y tad sy'n dwlu ar antur 

Mae rhai tadau'n hoffi byw'n beryglus! Os yw eich tad yn dwlu ar anturiaethau sy'n cynnig y cydbwysedd perffaith rhwng risg a gwobr, darllenwch y canlynol.  

Eich anrheg berffaith... 

• Profwch ei derfynau drwy sesiwn dringo creigiau ar glogwyni garw Gŵyr, ond peidiwch ag edrych i lawr!  

• Mae arfordiro yn cynnig cyffro lle gall eich tad neidio oddi ar glogwyni, nofio drwy gildraethau a sgrialu ar hyd yr arfordir dramatig – y ffordd ddelfrydol o gynyddu curiad ei galon!  

• Bydd cyfle i roi cynnig ar daflu bwyell – dyma ffordd ddifyr a chystadleuol o alluogi eich tad i ddangos ei sgiliau!  

#4 Y tad sy'n dwlu ar hel atgofion

Os yw eich tad yn hoffi mynd ar antur fawreddog yn fwy na chasglu pethau, yna rhowch gyfle iddo hel atgofion.

Eich anrheg berffaith...

• Dewch ag ef i Fae Abertawe, y Mwmbwls neu benrhyn Gŵyr am y penwythnos, i fyfyrio ar ei hufen iâ cyntaf erioed ger y môr!

• Dewch o hyd i'r union fan lle tynnwyd hen lun er mwyn creu casgliad o ffotograffau Ddoe a Heddiw sy'n siŵr o godi gwên. Nid yw byth yn rhy hwyr i ddechrau'r traddodiad hwn a byddwch yn darganfod llu o fannau hardd ym mhenrhyn Gŵyr sy'n addas at y diben.    

Gallwch fynd ar daith ar gefn beic ar hyd promenâd Abertawe, neu hedfan barcud  ar un o'n 19 o draethau nodedig

#5 Y tad sy'n dwlu ar gerddoriaeth

Os yw eich tad yn hoff o frolio am fod yn bresennol yn ystod digwyddiadau mawr, yna rhowch gyfle iddo gael profiad y gall fyfyrio arno am flynyddoedd i ddod.

Eich anrheg berffaith...

• Siomwch eich tad ar yr ochr orau drwy roi tocynnau iddo ar gyfer gig neu gyngerdd lle ceir cerddoriaeth fyw. O sioeau roc i setiau acwstig, neu bŵer cerddorfa lawn, mae Bae Abertawe'n cynnig rhywbeth at ddant pawb. Cymerwch gip ar ein hadran Digwyddiadau a gwnewch yn siŵr eich bod yn prynu’r tocynnau cyn iddynt ddiflannu!   

• Mae gwyliau ar gyfer pobl o bob oedran! Archebwch docynnau i ddigwyddiad a fydd yn sicrhau ymdeimlad da ymhell ymlaen llaw.

#6 Y tad sy'n dwlu ar gydweithio

Os yw eich tad yn gwerthfawrogi profiadau cyffredin lle gall pawb wneud cyfraniad, yna bydd cyfle i oresgyn heriau gyda'ch gilydd yn gwneud y tro i'r dim.

Eich anrheg berffaith...

• Rhowch gynnig ar ystafell ddianc lle bydd angen i’r teulu cyfan ddatrys problemau dan bwysau wrth i’r cloc dicio!

• Mae mynd ar antur mewn cwch yn eich galluogi i gael profiad uniongyrchol o natur a gweld golygfeydd godidog, gan gynnig cyffro i'r holl deulu. Neu gallwch logi cwch hwylio i weithio fel teulu mewn modd mwy ymarferol byth.

• Ewch i'r goedwig i feistroli sgiliau goroesi yn yr awyr agored. Bydd antur crefft y goedwig yn siŵr o danio'r dychymyg.

#7 Y tad sy'n dwlu ar grwydr hamddenol

Efallai mai mynd am dro (neu heic!) gyda'i hoff blentyn fyddai'r anrheg orau i'ch tad ar gyfer Sul y Tadau. Wedi'r cwbl, mae eich amser a'ch cwmni'n werth mwy nag unrhyw anrheg y gallwch ei phrynu! 

Eich anrheg berffaith...

• Archwiliwch Lwybr Arfordir Gŵyr 39 milltir o hyd gyda'ch gilydd. Ewch i ddarganfod Pen Pyrod a'i olygfeydd nodedig dros fae arobryn Rhosili.

• Trefnwch daith gerdded i leoliad atyniadol fel Llwybr Rheilffordd y Mwmbwls 5.5 milltir o hyd, sy'n olrhain traciau'r rheilffordd gyntaf i deithwyr yng Nghymru.

Neu ewch i Goed Cwm Penllergaer i weld golwg banoramig a rhaeadr ysblennydd o'r 19eg ganrif.

#8 Y tad sy'n dwlu ar weithgareddau

Os nad yw am dorheulo ar y traeth, yna bydd eich tad egnïol yn gobeithio am ddiwrnod llawn gweithgareddau ar Sul y Tadau.

Eich anrheg berffaith...

• Gall amrywiaeth eang Bae Abertawe, y Mwmbwls a Gŵyr o weithgareddau chwaraeon dŵr gynnig ymarfer corff yn yr awyr agored.

• Efallai y bydd yn awyddus i achub ar y cyfle i feistroli hen sgiliau saethyddiaeth. 

• Bydd ein parciau sglefrio lleol, heb sôn am yr amrywiaeth eang o chwaraeon antur sydd ar gael, yn apelio at ei ochr egnïol.    

#9 Y tad sy'n dwlu ar hanes

Mae'n ymddangos y gall y dyn hwn deithio drwy amser! Mae am wybod yr ateb i bob cwestiwn ac mae’n darllen pob gair ar blac gwybodaeth! A ydych yn adnabod rhywun fel hwn? Daliwch ati i ddarllen! 

Eich anrheg berffaith...

• Archwiliwch neuaddau hynafol, grisiau cudd a graffiti hanesyddol Castell Ystumllwynarth, lle ceir golygfeydd trawiadol dros y Mwmbwls.  

• Dysgwch am orffennol morol a diwydiannol Abertawe yn Amgueddfa Abertawe neu yn Amgueddfa Genedlaethol y Glannau, lle daw hanes yn fyw drwy arddangosion hynod ddiddorol. 

• Ewch i fan geni a chartref teuluol Dylan Thomas i gael cipolwg ar fyd plentyndod y bardd. 

#10 Y tad sy'n dwlu ar golff

Os yw'n achub ar bob cyfle i ymarfer ei sgiliau golff yn yr ystafell fyw, mae'n ymddangos bod eich tad yn gwbl gaeth i'r gamp!

Eich anrheg berffaith… 

• Trefnwch i'ch tad chwarae ambell rownd yn un o'n clybiau golff, lle gall fwynhau golygfeydd 360° godidog dros Fae Abertawe, y Mwmbwls a Gŵyr.

• Gall y teulu cyfan fwynhau rownd neu ddwy o golff gwallgof, neu'r dewis amgen egnïol – golff troed.

• Os yw’n hoff o gael math gwahanol o rownd ar ôl iddo orffen ar y cwrs, mae sawl lleoliad ym Mae Abertawe lle gall adrodd am ei holl gampau golffio wrth fwynhau bwyd a diod.