Mae Gwledd y Gaeaf ar y Glannau yn agor 21 Tachwedd 2025 – 4 Ionawr 2026!
Esgidiau sglefrio iâ yn barod!
Mae Gwledd y Gaeaf ar y Glannau yn dychwelyd eleni yn Abertawe ac mae tocynnau sglefrio iâ ar werth nawr!
Mae'r llyn iâ yng Ngwledd y Gaeaf ar y Glannau Abertawe'n cynnig profiad sglefrio iâ dan do Nadoligaidd a hudol, felly gallwch fwynhau eich hun ni waeth beth yw'r tywydd. Mae'r llyn sglefrio yn caniatáu i ymwelwyr ddawnsio ar hyd yr iâ gan fwynhau'r awyrgylch Nadoligaidd. Mae ei ddyluniad cysgodol yn golygu mai dyma'r gweithgaredd perffaith i deuluoedd, ffrindiau a chyplau fwynhau'r cyffro o sglefrio iâ mewn amgylchedd clyd, dan do.
Gallwch archebu eich tocynnau heddiw
Beth sy'n newydd ar gyfer 2025
Llwyfan cerddoriaeth fyw
Caiff cerddoriaeth fyw ei chwarae ar ddydd Gwener, dydd Sadwrn a dydd Sul yn yr ardal eistedd dan orchudd ger y bar.
Seddi dan orchudd
Mwynhewch fwyd a diod, boed law neu hindda yn yr ardal eistedd newydd sydd dan orchudd.
Ardal gwylio sglefrio iâ dan orchudd
Rydym wedi ychwanegu ardal wylio wedi'i gorchuddio i'ch cadw'n sych wrth wylio'ch anwyliaid yn sglefrio iâ.
Drysfa coed Nadolig
Cyfle i fynd ar goll! Drysfa coed Nadolig hudol newydd sbon i chi ddod o hyd i'ch ffordd o'i chwmpas.
Calendr Digwyddiadau Byw
Rydym yn cyflwyno calendr digwyddiadau byw a fydd yn cynnwys cerddoriaeth fyw a rhai ymweliadau gan westeion arbennig. Cadwch lygad ar gyfryngau cymdeithasol am y diweddaraf!
Reidiau'r Ffair
Yr Olwyn Fawr - Mae'r olwyn fawr drawiadol sy'n 40m o uchder, yn disgleirio'n llachar yn yr awyr gyda thros 10,000 o oleuadau. Mae lle arni i hyd at 240 o bobl ar y tro mewn 24 o gabanau ac mae'n cymryd tua dwy funud i wneud cylchdro llawn. Mae gennym hefyd gaban sydd wedi'i gynllunio'n arbennig i ddarparu mynediad i’r anabl. Mae’n addas i gadeiriau olwyn, gan olygu ei bod yn hawdd mynd ar yr olwyn fawr a dod oddi arni. Rydym yn ymfalchïo mewn bod yn addas i bob oed ac yn hygyrch i bawb. Mwynhewch eich reid gan roi sylw i'r holl gyfarwyddiadau diogelwch, ac edmygwch y golygfeydd godidog.
Drysfa coed Nadolig - Cyfle i fynd ar goll! Drysfa coed Nadolig hudol newydd sbon i chi ddod o hyd i'ch ffordd o'i chwmpas.
Moon-dancer - Mae'r atyniad ffair eiconig hwn yn addo taith syfrdanol yn llawn troadau a throelliadau i’ch gwefreiddio.
Freak Out - Pendil enfawr sy'n esgyn yn uchel i'r awyr, gyda phob siglad yn eich troi a throelli ar daith pensyfrdanol, llawn cyffro. Paratowch eich hun ar gyfer ymdeimlad o ysgafnder wrth i reid Freak Out eich gwefreiddio i’r eithaf.
Drysfa iâ - Drysfa ddrychau ar thema'r gaeaf i ddrysu'r ymennydd.
Ceir Clatsio - Cynnwrf a chyffro wrth i chi wibio o gwmpas y lle, gan wyro ac igam-ogamu i osgoi'r ceir eraill. Teimlwch wefr taro ffrindiau a theulu mewn gornest gyfeillgar am y craffaf a'r mwyaf medrus. Mae ein nodweddion diogelwch o'r radd flaenaf yn sicrhau profiad sy'n ddiogel i bawb.
Sizzler - Cyfuniad trawiadol o gyflymder, troeon a throelliadau a fydd yn eich cyffroi o'r dechrau i'r diwedd. Wrth i'r reid ddechrau, byddwch yn teimlo ffrwd o wynt wrth i'r Sizzler droi a throelli, gan eich cyfareddu a’ch syfrdanu. Mae'r goleuadau neon yn ychwanegu arddangosfa ddisglair, gan fywiogi'r noson gyda llewyrch hudolus.
Ice Jet - Mae Ice Jet, sy'n cyrraedd cyflymderau o dros 50mya, yn reid llawn hwyl a chyffro! Nid dyma ddiwedd y cyffro, gan fod Ice Jet yn brofiad clyweledol unigryw. Ceir dros 5,000 o oleuadau llachar ar y reid, gan gynnwys goleuadau neon, laserau a chanonau CO2!
Llithren eira - Cydiwch mewn tiwb chwyddadwy, dringwch i ben y llithren a theimlwch y wefr wrth i chi wibio i lawr y llethr llithrig.
Reidiau i blant
Race-o-rama - Mae reid Race-o-Rama'n cynnwys llwybr gwefreiddiol yn llawn troeon, troadau a bachdroeon a fydd yn rhoi eich sgiliau gyrru ar brawf.
Cwpanau te - Cwpanau te deniadol wedi'u haddurno â lliwiau llachar a chymeriadau ciwt, sy'n gwahodd eich plant i gamu i mewn iddynt a mynd ar daith droellog ddifyr. Wrth i'r reid ddechrau, mae'r cwpanau te'n cylchdroi, gan wneud i'ch plant deimlo fel pe baent yn troelli o gwmpas mewn te parti rhyfeddol.
Jetiau – Dewch i hedfan fry! Mae'r awyrennau 2 sedd hyn yn troelli mewn cylchoedd a gall y gweithredwr wneud iddynt esgyn a disgyn, yn union fel hedfan awyren!
Y Tŷ Hwyl - Mae ymwelwyr yn dilyn llwybr yn llawn rhithiau optegol, lloriau anwastad, coridorau tywyll ac elfennau symudol fel barilau sy'n troelli a drychau ystumiol, gan herio cydbwysedd a chanfyddiad y plant mewn profiad difyr a doniol.
Ffigar-êt Go-Gator - Mae'r reid hudolus hon wedi'i chynllunio gan ystyried ein hanturiaethwyr ifanc, gan ddarparu profiad diogel ond gwefreiddiol a fydd yn eu difyrru. Mae pob car Go Gator deniadol yn cynnwys dyluniadau lliwgar a chyfeillgar sy'n tanio'r dychymyg.
Trên The Grinch - Trên bwganod ar thema'r Nadolig, gyda phethau annisgwyl ar thema The Grinch.
Cynnig Bwyd a Diod
I'w bwyta
Brechdanau lapio Pwdin Swydd Efrog - cig eidion rhost brau sy'n toddi yn eich ceg, cyw iâr suddlon neu lysiau llawn blas, i gyd mewn brechdan lapio Pwdin Swydd Efrog. Mae pob brathiad yn fendigedig, yn llawn blas ac ansawdd.
Byrgyrs a sglodion - Byrgyrs â thopins, sglodion, cyw iâr mewn briwsion a sbeisiau wedi'i ffrio a dewis amrywiol o brydau i blant.
Bratwurst a goginiwyd ar ridyll - Cŵn poeth Bratwurst traddodiadol wedi'u coginio ar ridyll sy'n hongian dros dân sy'n llosgi glo. Gallwch ddewis o amrywiaeth o dopins a blaslynnau er mwyn cael ci poeth sydd wrth eich bodd. O fwstard clasurol a sos coch i winwns sawrus a chaws blasus, mae gennym ddetholiad at ddant pawb.
I'w hyfed
Caban coffi - Gallwch ddewis o amrywiaeth o goffi - o espressos clasurol a lattes llaethog i gappuccinos ewynnog a mochas melfedaidd. Mae gennym goffi i weddu i bob chwaeth, gan wneud pob egwyl goffi'n brofiad personol.
Siocled poeth - I'r rheini sydd am gael trît melys, mae ein diodydd siocled poeth blasus yn aros amdanoch. Blaswch foethusrwydd ein siocled poeth nodweddiadol, gyda hufen chwip a naddion siocled - cwtsh mawr mewn cwpan!
Bar Alpaidd - Dewch i fwynhau cwrw casgen oer, neu win twym y gaeaf. Ein bar Alpaidd cynnes yw'r lle perffaith i fwynhau diod gyda bythod wedi'u gwresogi i'ch cynhesu ar nosweithiau oer y gaeaf.
Melysfwyd
Stondinau Losin - Mae byd o felysrwydd a hiraeth yn aros amdanoch yn ein Ffair Draddodiadol.
Stondin Losin a Chymylau Siwgr – dewis amrywiol a blasau dymunol. Melys moes mwy!
Stondin Malws Melys wedi'u Tostio
- Paratowch am antur felys yn ein stondin malws melys wedi'u tostio, melysfwyd meddal a chynnes i dynnu dŵr o'ch dannedd. Gallwch dostio'ch malws melys eich hun dros ein tân coed.
