Eleni, mae tîm Cyngor Abertawe sy’n trefnu digwyddiad blynyddol Sioe Awyr Cymru’n bwriadu nodi’r digwyddiad mewn ffordd ychydig yn wahanol.
Yn anffodus, ni fydd y digwyddiad hynod boblogaidd yng nghalendr digwyddiadau Abertawe’n digwydd eleni oherwydd y pandemig Coronafeirws. Fodd bynnag, yn hytrach nag anwybyddu’r bwlch yn y calendr, mae’r tîm wedi datblygu dathliad digidol o Sioe Awyr Cymru ar gyfer ddydd Sadwrn 4 Gorffennaf rhwng 11am a 5pm. Bydd y digwyddiad rhithwir hwn yn dangos uchafbwyntiau gorau rhai o’r timau arddangos sydd wedi perfformio ym Mae Abertawe, gan gynnwys y Chinook, y Tutor, Hediad Coffa Brwydr Prydain, y Tigers a’r Red Arrows gwych.
Meddai Robert Francis-Davies, Aelod y Cabinet dros Fuddsoddi, Adfywio a Thwristiaeth, “Mae pawb yn dwlu ar Sioe Awyr Cymru, sef un o uchafbwyntiau ein calendr digwyddiadau blynyddol, a ddenodd dros 250,000 o bobl y llynedd. Roedd timau Digwyddiadau a Marchnata ein Gwasanaethau Diwylliannol yn amlwg yn siomedig na allai’r digwyddiad fynd yn ei flaen ond roeddent yn benderfynol o sicrhau y gallai’r cyhoedd fwynhau digwyddiad amgen i nodi’r achlysur. Rydym bellach yn cynllunio dathliad o Sioe Awyr Cymru y gall pobl ei fwynhau o’u cartrefi eu hunain.”
“Cynhelir y digwyddiad digidol mewn cydweithrediad â Ron Skinner & Sons, a bydd yn cynnwys uchafbwyntiau’r arddangosiadau awyr gwahanol o’r gorffennol, a fydd yn hel atgofion melys i’r rhai a ddaeth i’r digwyddiadau hynny ac yn denu cynulleidfaoedd newydd ar gyfer y dyfodol.”
Mae digwyddiad Sioe Awyr Cymru’n addas ar gyfer teuluoedd a bydd gweithgareddau cysylltiedig i blant cyn y digwyddiad, gan gynnwys chwileiriau, cwisiau, gweithgareddau creu awyrennau a thaflenni lliwio, yn ogystal â chystadlaethau gwych.
earches, quizzes, plane-making and colour-in sheets, and some great competitions too.
Am fanylion llawn dathliad digidol Sioe Awyr Cymru ddydd Sadwrn 4 Gorffennaf, ewch i www.walesnationalairshow.com/cy/ a dilynwch y digwyddiad ar Facebook.