Glynn Vivian Art Gallery

Wedi'i gosod yng nghalon y ddinas, mae Oriel Glynn Vivian yn ganolfan ragoriaeth ar gyfer y celfyddydau gweledol ac yn oriel o safon fyd-eang ar gyfer Cymru.

Mae'r Oriel yn fan celf bywiog ac ysbrydoledig am ddim i bawb sydd yn darparu lle ar gyfer arddangosfeydd celf hanesyddol, fodern a chyfoes, sgyrsiau, darlithoedd a chynadleddau, cerddoriaeth fyw, perfformiadau a digwyddiadau yng nghalon ardal artistig brysur Abertawe.

Ailagorodd ym mis Hydref 2016 yn dilyn prosiect adfywio mawr i drawsnewid a gwarchod adeilad rhestredig Gradd II* gwreiddiol yr oriel sy'n dyddio o 1911. Mae'r adeilad bellach yn cynnig profiad i ymwelwyr sy'n hygyrch, yn groesawgar ac wedi'i hadfywio ar gyfer y 21ain ganrif.

Mae orielau newydd wedi cael eu hychwanegu, yn ogystal â stiwdios cadwraeth arbenigol, storfa gasgliadau, theatr ddarlithio benodol ag 80 o seddi, llyfrgell ac archifdy, caffi newydd a siop.

Mae Oriel Gelf Glynn Vivian (sefydlwyd ym 1911) wedi datblygu casgliad sylweddol sy'n cynnwys sbectrwm eang o'r celfyddydau gweledol o hen gewri i artistiaid cyfoes, gyda chasgliad rhyngwladol o borslen a tsieni Abertawe.

Mae'r oriel hefyd yn cynnal arddangosfeydd teithiol cenedlaethol a rhyngwladol o waith artistiaid cyfoes pwysig yn ogystal â sioeau hanes celf. Mae hefyd yn rhoi llwyfan i artistiaid yng Nghymru i gyflwyno eu gwaith mewn cyd-destun lleol, cenedlaethol a rhyngwladol.

Mae'r tîm dysgu arobryn yn helpu i ddatblygu awyrgylch cyfeillgar a chefnogol lle gall pobl o bob oedran ddatblygu eu dealltwriaeth o'r byd celf, yn ogystal â rhaglen ddehongli gymunedol gyffrous yn llawn sgyrsiau, darlithoedd, teithiau a digwyddiadau.

Mae Oriel Gelf Glynn Vivian yn rhan o Ddinas a Sir Abertawe ac fe'i cefnogir trwy grant gan Gyngor Celfyddydau Cymru.

Mae Oriel Gelf Glynn Vivian yn bartner i’r Tate ac mae'n cyfnewid rhaglenni, syniadau a sgiliau â rhwydwaith Plus Tate o sefydliadau celfyddydau gweledol ar draws y DU.

gwefan www.orielglynnvivian.org