Pum ffordd wych o wneud Sul y Mamau'n fythgofiadwy ym Mae Abertawe!

1. Maldodi ei Blasbwyntiau

Mae pryd blasus bob amser yn boblogaidd ar Sul y Mamau!  
P'un a yw hi’n hoff o de prynhawn pleserus mewn gwesty modern o safon, dalfa'r dydd mewn bwyty ffasiynol ar lan y môr, neu ginio dydd Sul swmpus mewn tafarn atyniadol yng nghefn gwlad, mae Bae Abertawe'n cynnig dewis anhygoel o fannau bwyta. Archwiliwch yr ystod wych o opsiynau bwyd a diod a chymerwch gip ar y Cynigion Sul y Mamau i'ch helpu i gynllunio profiad ciniawa a fydd yn gwneud ei diwrnod yn fwy arbennig byth! 

Peidiwch â cholli hyn!   
15 Mawrth – Cinio Sul y Mamau a Chyd-ganu i ‘Mumma Mia’ 

2. Archwilio'r Awyr Agored

Dathlwch Sul y Mamau ym Mae Abertawe drwy fwynhau'r awyr agored gyda'ch gilydd. Os yw eich mam yn dwlu ar fyd natur, ewch â hi am dro atyniadol drwy Goed Cwm Penllergare – sy'n cynnig rhaeadrau, coetiroedd a'r lle perffaith i gael picnic! I weld golygfeydd arfordirol anhygoel, dilynwch Lwybr Arfordir Gŵyr.  Ewch ar grwydr i anadlu awyr iach y môr a mwynhau harddwch ein traethau arobryn. Os ydych yn mynd am dro tawel mewn coetir neu'n cael antur ger y môr, mae treulio amser yn yr awyr agored gyda rhywun arbennig yn ffordd berffaith o gysylltu â'ch gilydd a mwynhau'r diwrnod.  

3. Daranfod Diwylliant Abertawe

Ewch allan i fwynhau diwrnod diwylliannol cofiadwy!  

Dechreuwch drwy ymweld ag un o orielau celf y ddinas, lle gallwch archwilio arddangosfeydd ysgogol sy'n cynnwys gwaith clasurol a chyfoes. I'r rhai hynny sy'n dwlu ar hanes, mae Abertawe'n gartref i amgueddfeydd hynaf a diweddaraf Cymru. Ceir mynediad am ddim i’r ddwy amgueddfa, sy’n cynnig dealltwriaeth ddifyr o dreftadaeth gyfoethog y ddinas. Am noson o adloniant, archebwch docynnau am sioe fyw mewn theatr, neu cymerwch gip ar un o'r lleoliadau bywiog yn y ddinas sy'n cynnig cerddoriaeth fyw, lle gallwch weld artistiaid lleol a theithiol talentog. Cofiwch archwilio ein tudalen “Digwyddiadau” i weld y digwyddiadau diweddaraf a chynllunio'r profiad diwylliannol perffaith y bydd hi’n dwlu arno. 

4. Defnyddio eich Doniau Creadigol!

Ar Sul y Mamau, beth am gyfnewid blodau a siocledi am brofiad creadigol ymarferol? Rhowch gynnig ar ddosbarth crochenwaith lle gallwch lunio a phaentio rhywbeth unigryw i'w gadw, neu ymunwch â sesiwn baentio dan arweiniad i greu campwaith lliwgar. Gallech hefyd roi cynnig ar ddosbarth addurno teisennau, paentio teils neu ddylunio gemwaith unigryw. Yn ogystal â chael hwyl, bob tro y bydd eich mam yn gweld eich creadigaeth a wnaed â llaw, bydd yn cofio'r amser arbennig y gwnaethoch dreulio gyda'ch gilydd – waeth pa mor ddi-siâp y mae’r fâs honno! 

Peidiwch â cholli hyn!   
12 Mawrth – Addurno Teisen Bento
13 Mawrth –  Gwener Tecstilau

5. Hwyl ac Antur i'r Teulu!

I fenywod sy'n dwlu ar antur, rhowch gyfle i'ch mam gael blas ar brofiad awyr agored cyffrous fel padlfyrddio, caiacio neu hyd yn oed gwers syrffio – sy'n berffaith ar gyfer ychwanegu tro gwefreiddiol at eich diwrnod allan gyda'r teulu!  

Ar ôl amser llawn cyffro ar y dŵr, ewch dan do i gael rhagor o hwyl. Heriwch eich man i chwarae rownd o golff gwallgof, mwynhau cystadleuaeth gyfeillgar mewn caffi gemau bwrdd, profi ei gallu i ymateb yn gyflym mewn gêm laser neu archwilio sw trofannol lle gall fod yng nghwmni creaduriaid anhygoel a hyd yn oed bwydo'r crocodeilod! Dyma'r ffordd orau o chwerthin, rhannu hwyl a sbri a chreu atgofion parhaol gyda'ch gilydd!  

Peidiwch â cholli hyn!   
15 Mawrth – Sul y Mamau yn Sŵ Trofannol Plantasia (beth am roi hud a lledrith y jyngl i'ch Mam AM DDIM* pan fyddwch chi'n prynu tocynnau ar-lein gan ddefnyddio'r côd CARUMAM)

Does dim ots sut rydych yn dewis dathlu, mae Bae Abertawe, y Mwmbwls a Gŵyr yn llawn ffyrdd o wneud Sul y Mamau'n ddiwrnod arbennig iawn. 

Ydych chi'n chwilio am y rhodd berffaith honno? Mae gennym ddigon o opsiynau i ddangos eich bod yn ystyriol ohoni - porwch farchnadoedd lleol, siopau annibynnol ac orielau creadigol am grefftwaith, cerameg a gemwaith unigryw. I gael mwy fyth o ysbrydoliaeth, archwiliwch ein tudalen syniadau am roddion a chymerwch gip ar ein cynigion Sul y Mamau. 

Gan fod cymaint i'w archwilio a'i fwynhau, beth am ymestyn y dathliad ac aros dros y penwythnos! P'un a ydych yn aros ger yr arfordir, yng nghanol y ddinas, neu yng nghefn gwlad, mae digon o fannau gwych i aros ynddynt. Felly, ewch ati i gynllunio rhywbeth bythgofiadwy i sicrhau y bydd y person arbennig hwnnw'n mwynhau penwythnos o safon!