Mae'r Gwanwyn wedi Cyrraedd

Y Gwanwyn yn Amgueddfa Genedlaethol y Glannau

Mae'r gwanwyn wedi cyrraedd Amgueddfa Genedlaethol y Glannau a gallwch fwynhau tymor llawn darganfod, creadigrwydd a dathlu yno.

Ymunwch â'r amgueddfa ar gyfer y canlynol:

• Dathliadau Dydd Gŵyl Dewi ar 1 Mawrth.
• Pori drwy drysorau unigryw yn y Ffair Hen Bethau a Gwneuthurwyr o 7 i 8 Mawrth
• Gall plant bach (ac oedolion hefyd) gymryd rhan mewn sesiynau crefft Gwneud a Chadw, sy'n berffaith ar gyfer tanio creadigrwydd
• Cadwch lygad am weithgareddau a digwyddiadau ar thema'r Pasg sy'n sicr o addo ymweliad g-wy-ch â'r amgueddfa.

Ar 22 Ebrill, bydd Amgueddfa Genedlaethol y Glannau'n cynnal y perfformiad cyntaf yng Nghymru o 'Jo in the Water', ffilm wych sy'n gwneud argraff go iawn gyda'i stori bwerus. Mae tocynnau'n gwerthu'n gyflym, felly archebwch eich rhai chi heddiw!

Wrth i chi archwilio'r amgueddfa, byddwch yn sylwi bod newidiadau ar droed. Mae gwrthrychau newydd a straeon ffres yn dod i'r amlwg wrth i'r amgueddfa barhau i ddod yn amgueddfa'r glannau go iawn, sy'n rhannu cysylltiadau cryfach â threftadaeth forwrol gyfoethog Cymru.

Mae'r amgueddfa ar agor 7 niwrnod yr wythnos, a chyda mynediad am ddim mae rhywbeth i bob aelod o'ch criw. Felly, beth am gychwyn ar eich taith ddarganfod eich hunan y gwanwyn hwn yn Amgueddfa Genedlaethol y Glannau?

Castell Ystumllwynarth yn Ailagor!

Bydd Castell Ystumllwynarth yn croesawu ymwelwyr unwaith eto wrth iddo ailagor ar 28 Mawrth 2026, gan gynnig mynediad dyddiol i'w safle hanesyddol a’i olygfeydd godidog o Fae Abertawe.

Gyda digwyddiadau, teithiau tywys a gweithgareddau sy'n addas i deuluoedd, mae ailagor y castell yn uchafbwynt diwylliannol cyffrous ar gyfer y gwanwyn.

Nodwch y rhain yn eich calendrau:

⚔️ Gwerin y Gŵyr – 28 Mawrth

🐰 Yr Helfa Wyau Pasg Fawr – 5 Ebrill

🏆 Gemau Calan Mai - 4 Mai  

🧸 Picnic Tedi Bêrs - 25 Mai

Ni fyddwch am golli'r holl ddigwyddiadau difyr sydd yn yr arfaeth yn y gwanwyn!

Darllen ar gyfer Lles ar Ddiwrnod y Llyfr

Nid plant yn unig sy'n dathlu Diwrnod y Llyfr.

Mae Darllen yn Well i deuluoedd yn argymell casgliad i gefnogi rhieni a gofalwyr i ofalu am eu lles yn ystod beichiogrwydd a'r blynyddoedd cynnar, o feichiogi i ddwy oed. Mae'r gyfres hon o lyfrau llawn gwybodaeth yn darparu gwybodaeth am les, iechyd meddwl ac ymdopi â cholled.

Ym mhle ydw i'n dod o hyd i'r llyfrau?

• Siaradwch â staff eich llyfrgell leol am fenthyca'r llyfrau am ddim
• Mae cyfnod benthyca estynedig o 6 wythnos ar gyfer llyfrau Darllen yn Well Gellir adnewyddu'r llyfrau os oes angen mwy o amser arnoch i'w darllen

Mae prawf gwyddonol bod darllen yn gwella lles. Mae cynlluniau Darllen yn Well eraill sy'n cefnogi plant, pobl ifanc yn eu harddegau, dementia ac iechyd meddwl ar gael gan wasanaeth Llyfrgelloedd Abertawe a gallant helpu i leihau straen a gwella'n lles.

Os nad ydych eisoes yn aelod, mae ymuno â'ch llyfrgell leol yn hawdd ac yn rhad ac am ddim. Gall aelod o staff y llyfrgell eich helpu chi i ymuno!

Gŵyl Bwyd a Diod Abertawe

Mae Gŵyl Bwyd a Diod Abertawe'n dychwelyd o ddydd Gwener 27 i ddydd Sul 29 Mawrth 2026 gydag amrywiaeth o fwyd a diod anhygoel gan fasnachwyr annibynnol.

Beth i'w ddisgwyl:

• Bwyd stryd o bob rhan o'r byd
• Danteithion melys a deunydd pob artisan
• Diodydd crefft a chynhyrchwyr lleol
• Stondinau â chynnyrch unigryw a wnaed â llaw a stondinau annibynnol
• Awyrgylch bywiog, croesawgar yng nghanol y ddinas

Pryd:

• Dydd Gwener 27 Mawrth | 10am - 7pm
• Dydd Sadwrn 28 Mawrth | 10am – 7pm
• Dydd Sul 29 Mawrth | 10am – 5pm

Ble: Stryd Rhydychen, Princess Way a Portland Street

Cost: AM DDIM - nid oes angen tocyn.

Shen Yun yn cynnig blas ar 5,000 o flynyddoedd o ddiwylliant Tsieina

Bydd Shen Yun yn mynd â chi ar daith anhygoel drwy 5,000 o flynyddoedd o ddiwylliant dwyfol Tsieina. Dewch i gael blas ar chwedlau bytholwyrdd, harddwch cain o fytholeg ddwyfol, doethineb dwfn o freninlinau'r gorffennol, a thraddodiadau ethnig drwy ddawnsio Tsieineaidd clasurol, cerddoriaeth gerddorfaol fyw hudolus, gwisgoedd gwirioneddol a chefndiroedd rhyngweithiol pwrpasol.

Caiff 20 o drefniannau eu perfformio gan 500 o artistiaid o'r radd flaenaf a bydd y themâu'n amrywio o ysblander boneddigesau llys Tang, i orchestion cadfridogion ar faes y gad, gwaith athronyddol bytholwyrdd Lao-Tzu, a golygfeydd nodedig o deyrnasoedd nefol.

Mae Arena Swansea Building Society yn eich croesawu am noson llawn harddwch, doethineb, dewrder a gobaith. Dewch i weld harddwch y nefoedd ar y llwyfan a hudoliaeth Shen Yun yn fyw.
 

Pryd: Nos Fawrth 24 Mawrth – dydd Iau 26 Mawrth

Ble: Arena Swansea Building Society

Cost: O £62 ynghyd â ffi archebu

Bydd ras 10k Bae Abertawe'n dychwelyd ar 20 Medi

Gyda'r clociau'n mynd ymlaen a'r nosweithiau'n mynd yn hirach, dyma'r adeg berffaith i hyfforddi yn yr awyr agored. Mae awyr iach, nosweithiau goleuach a nod pendant yn gyfuniad pwerus.

Mae ras 10k Bae Abertawe yn dychwelyd ar 20 Medi, sy'n rhoi digon o amser i chi adeiladu momentwm a mwynhau paratoi at ddiwrnod y ras. P'un a ydych eisiau curo'ch amser gorau neu’n chwilio am her newydd, mae dechrau yn awr yn syniad da.

Clymwch eich lasys, ewch y tu allan a manteisiwch ar dywydd y tymor.

Gwobrau Chwaraeon Abertawe 2025

Mae tocynnau bellach ar werth ar gyfer Gwobrau Chwaraeon Abertawe 2025 mewn cydweithrediad â Freedom Leisure. Ymunwch â ni ar gyfer y seremoni ar 2 Ebrill 2026 yn Neuadd Brangwyn i ddathlu'r athletwyr, y timau, yr hyfforddwyr a'r gwirfoddolwyr sy'n helpu i wneud Abertawe'n ddinas o chwaraeon.

Cipolwg ar Ddigwyddiadau Gwych yn 2026

Wrth i ni lansio blwyddyn wych arall o ddigwyddiadau, gadewch i ni edrych yn ôl ar rai o uchafbwyntiau 2025!