Mae hanner tymor mis Chwefror ar ddod, felly beth am archebu seibiant haeddiannol fel trît i'ch hun? Gwnewch Fae Abertawe'n ganolbwynt i chi ar gyfer antur ddifyr i'r teulu!
Mae'r awyr agored yn galw! Ewch allan i archwilio llwybrau arfordirol ysgubol, traethau euraidd a golygfeydd godidog yr hanner tymor hwn. Cerddwch ar hyd rhan o Lwybr Arfordir Gŵyr sy'n 38 milltir o hyd neu gallwch fwynhau'r dŵr ar hyd glan y môr. Cofiwch gymryd cip ar ein harweiniad i draethau sy'n cynnwys 19 o draethau hardd - mae'n berffaith ar gyfer darganfod mannau sy'n addas i deuluoedd gyda chaffis a chyfleusterau defnyddiol. Wrth gwrs, mae croeso i'ch cŵn ddod gyda chi ar eich antur hefyd!
Os yw'ch anturiaethwyr bach yn awyddus i ddarganfod rhyfeddodau'r byd bywyd gwyllt lleol (gydag ychydig o byllau mwdlyd ar hyd y ffordd!), gallwch ddechrau yng Nghoed Cwm Penllergaer - 250 erw o goetir hynafol sy'n gartref i adar fel teloriaid y cnau, dringwyr bach, sgrechod y coed a chnocellod y coed. Ewch i Erddi Clun - parc botaneg 50 erw hardd sy'n cynnwys Tŵr y Llyngesydd a phont Japaneaidd. Mae cynifer o fannau gwyrdd i'w darganfod ac mae Bae Abertawe'n berffaith ar gyfer awyr iach, meddyliau chwilfrydig a digon o hwyl i'r teulu!
Ym Mae Abertawe, mae'r hwyl yn parhau hyd yn oed ar ddiwrnodau glawog! Dewch wyneb yn wyneb â chreaduriaid anhygoel mewn sw trofannol (lle gallwch fwydo crocodeilod!), cwblhau cwrs Ninja Warrior, rhoi cynnig ar ddringo dan do, mwynhau caffis gemau bwrdd ac archwilio amgueddfeydd diddorol (gan gynnwys yr amgueddfa hynaf a’r amgueddfa fwyaf cyfoes yng Nghymru!). Gallwch ymuno mewn gweithdy ar Dduwiau hen wlad Groeg, gwylio sioe Bluey yn fyw ar lwyfan neu gael eich diddanu gan berfformiad syrcas anhygoel.
Pan fydd anturiaethau'r diwrnod drosodd, mae gennym ddigon o lety sy'n addas i'r teulu lle gallwch ymlacio ac ymgartrefu. Gallwch aros yng nghanol y ddinas, deffro i olygfeydd o'r arfordir neu ddianc i gefn gwlad yma ym Mae Abertawe, y Mwmbwls a Gŵyr.
