Archwilio Llwybr Arfordir Cymru ym Mae Abertawe, y Mwmbwls, a Gŵyr

Ewch am dro! Archwilio Llwybr Arfordir Cymru ym Mae Abertawe, y Mwmbwls, a Gŵyr  

Mae Llwybr Arfordir Cymru'n ymestyn yn nodedig am 870 o filltiroedd, gan ddilyn holl arfordir Cymru a chynnig golygfeydd heb eu hail, hanes cyfoethog ac ymdeimlad dwfn o gysylltu â byd natur.  
Ceir un o'r rhannau harddaf ym Mae Abertawe, gan sy’n mynd â chi drwy bentref glan môr hyfryd y Mwmbwls ac yn treiddio i anialwch anhygoel Tirwedd Genedlaethol Gŵyr - yr ardal o harddwch naturiol eithriadol gyntaf yn y DU.  

P'un a ydych yn cynllunio taith gerdded fer, yn mynd am dro dros y penwythnos neu’n ymgymryd ag antur heicio go iawn, mae'r rhan hon o'r llwybr, sy'n 56 milltir o hyd, yn cynnig amrywiaeth o dirweddau, gweithgareddau a mannau aros sy'n berffaith i bobl leol ac ymwelwyr fel ei gilydd.  

Ewch ati i wisgo eich esgidiau cerdded a gwefru eich ffôn (ar gyfer hunluniau, wrth gwrs!) – dyma sut i fwynhau'r ardal i'r eithaf!  

Bae Abertawe: Lle mae'r ddinas yn cyrraedd y môr 

Dechreuwch eich taith ym Mae Abertawe, lle mae Llwybr Arfordir Cymru'n ymestyn ar hyd promenâd eang sy'n troi o gwmpas y bae o brysurdeb y glannau i bier y Mwmbwls. Mae'r rhan hon yn berffaith i deuluoedd, beicwyr ac unrhyw un sydd am fynd am dro hamddenol.  

Pethau i'w gweld a'u gwneud: 

• Marina Abertawe: Ardal glan môr fywiog llawn cychod, caffis ac awyrgylch bywiog 

• Llogi cychod hwylio: Archwilio’r arfordir atyniadol ar gwch 

• Amgueddfeydd: Dewch i amgueddfeydd hynaf a mwyaf newydd Cymru. Ceir mynediad am ddim i’r ddwy amgueddfa, sy’n cynnig dealltwriaeth ddifyr o dreftadaeth gyfoethog y ddinas 

• Traeth Bae Abertawe: Ardal eang o dywod euraidd a dyfroedd bas sy'n berffaith ar gyfer padlo neu ymdrochi. Os ydych yn amseru eich taith yn iawn, efallai y cewch weld golygfa odidog wrth i'r haul fachlud!

Y Mwmbwls: Pentref atyniadol ar lan y môr

Wrth i chi ddilyn yr arfordir tua'r gorllewin, byddwch yn cyrraedd y Mwmbwls, pentref Fictoraidd atyniadol ar lan y môr llawn lleoedd ffasiynol, orielau a lleoedd gwych i fwyta. Mae Llwybr Arfordir Cymru'n ymestyn ar hyd y glannau, gan gynnig golygfeydd panoramig ar hyd Bae Abertawe a'r tu hwnt.  

Pethau i'w gweld a'u gwneud: 

• Pier y Mwmbwls: Tirnod Fictoraidd enwog ag ardal sy'n cynnwys arcêd draddodiadol, olwyn fawr a golygfeydd dros oleudy'r Mwmbwls.  

• Castell Ystumllwynarth: Castell Normanaidd nodedig sy'n cynnig golygfeydd ysgubol dros y bae a hanes cyfoethog sy'n dyddio yn ôl i'r 12fed ganrif 

• Orielau: Darganfyddwch waith celf lleol, casgliadau unigryw a rhoddion Arbennig 

• Chwaraeon dŵr: Padlo bwrdd ar eich traed neu Syrffio ar fwrdd padlo gyda hwyl  

• Archwilio pyllau trai: Bae Bracelet

Bae Langland  

Yn adnabyddus am ei draeth tywodlyd, ei gytiau atyniadol a'i fannau syrffio gwych. Cadwch lygad am adar y môr wrth i chi gerdded ar hyd y clogwyni atyniadol.  
 
Pethau i'w gweld a'u gwneud: 

• Chwaraeon dŵr: Syrffio a padlo bwrdd ar eich traed 

• Gweithgareddau ar y traeth: Torheulo, nofio ac adeiladu cestyll tywod 

Bae Caswell  

Mae'r bae'n boblogaidd ymhlith pobl sy'n dwlu ar chwaraeon dŵr a theuluoedd, gan gynnwys traeth tywodlyd ac amwynderau cyfleus.  

Pethau i'w gweld a'u gwneud: 

• Chwaraeon dŵr: Syrffio  padlo bwrdd ar eich traed. Lleoliad Surfability UK (ysgol syrffio addasol a chynhwysol sy'n arwain y ffordd yn fyd-eang) 

• Chwaraeon traeth 

• Archwilio pyllau trai 

Bae y Tri Chlogwyn 

Mae'r bae hwn, un o'r mannau mwyaf poblogaidd ymhlith ffotograffwyr yng Nghymru, yn tynnu dŵr o'r dannedd, gan godi o'r tywod ac afon droellog sy'n arwain at y môr.  

Pethau i'w gweld a'u gwneud: 

• Dringo creigiau: Llwybrau dringo i bobl o bob gallu, a golygfeydd godidog o'r copa 

• Castell Pennard: Adfeilion hynaf uwchben y bae  

• Ffotograffiaeth: Yn ddelfrydol er mwyn tynnu lluniau o'r haul yn codi ac yn machlud 

• Canolfan Treftadaeth Gŵyr: Amgueddfa bywyd gwledig a chanolfan grefftau  

Bae Oxwich 

Yn adnabyddus am ei draethau tywodlyd helaeth, ei dwyni tywod a'i forfeydd heli. Mae'n boblogaidd ar gyfer nofio, chwaraeon dŵr a gwylio adar.  
 Pethau i'w gweld a'u gwneud: 

• Chwaraeon dŵr: Caiacio, padlfyrddio, reidiau ar offer chwyddadwy a hwylfyrddio 

• Teithio ar gwch: Dewch i archwilio'r arfordir atyniadol ar gwch a chymryd cip ar y bywyd morol lleol 

• Sauna: Dewch i fwynhau sauna sy'n cael ei wresogi drwy dân coed ar y traeth 

• Castell Oxwich: Adfeilion plasty o oes y Tuduriaid sy'n cynnig golygfeydd dros y bae  

Bae Porth Einon 

Traeth poblogaidd sy'n addas i deuluoedd. Mae ganddo lannau tywodlyd diogel ac mae’n enwog am smyglwyr. Mae'n boblogaidd am chwaraeon dŵr ac mae'n cynnig mynediad hawdd a chyfleusterau cyfagos.  

Pethau i'w gweld a'u gwneud: 

• Chwaraeon dŵr: Caiacio, padlfyrddio, corff-fyrddio a snorcelu 

• Pysgota: Dewch i ddal draenogiaid môr a physgod lleol eraill 

• Blas ar Jin: Dewch i gael blas ar fathau gwahanol o jin crefft arobryn mewn gardd jin  

Bae Rhosili a Thraeth Llangynydd 

Mae Bae Rhosili'n aml yn un o'r traethau gorau yn y DU (a hyd yn oed y byd!), gan gynnig golygfeydd sy'n tynnu dŵr o'r dannedd, clogwyni anferth a lleoliad eiconig Pen Pyrod. Gerllaw, mae traeth Llangynydd yn boblogaidd iawn ymhlith syrffwyr.  

Pethau i'w gweld a'u gwneud: 

• Taith Gerdded Pen Pyrod: Yn hygyrch pan fydd y llanw ar drai. Gwiriwch amserau'r llanw! 

• Gwylio bywyd gwyllt: Cadwch olwg am ddolffiniaid, llamhidyddion, morloi ac adar y môr 

• Arfordiro: Dewch i ddringo, neidio a nofio ar hyd clogwyni dramatig Gŵyr 

• Syrffio: Mae gwersi syrffio ar gael yn yr ysgol syrffio leol 

• Hedfan Barcutiaid: mae’r amodau gwyntog naturiol yn ei wneud yn berffaith ar gyfer barcutiaid 

Gogledd Gŵyr

Mae gogledd Gŵyr yn encilfa heddychlon â thirweddau atyniadol, pentrefi penigamp a morydau mawreddog. Mae'r llwybrau ysgafn yn berffaith er mwyn mynd am dro hamddenol a gwylio adar.  
 

Pethau i'w gweld a'u gwneud: 

• Castell Weble: Adfeilion plasty o'r 14eg ganrif, sy'n cynnig golygfeydd panoramig dros forfeydd heli Llanrhidian a Moryd Llwchwr. 

• Twyni Whiteford: Traeth anghysbell sydd heb ei ddifetha. Gallwch gerdded i oleudy Whiteford pan fydd y llanw ar drai

Awgrymiadau Gwych  

Diogelwch  

• Esgidiau: Mae esgidiau ymarfer yn addas o Abertawe i'r Mwmbwls; mae esgidiau cerdded yn fwy addas ym mhenrhyn Gŵyr 

• Arhoswch ar y llwybr: Mae rhai rhannau'n agos at ymylon clogwyni – byddwch yn ofalus wrth gerdded!  

• Cŵn: Yn ddelfrydol er mwyn mynd â'r ci am dro, ond cadwch olwg am glogwyni, bywyd gwyllt, da byw a chyfyngiadau tymhorol ar draethau  

• Llanw: Dim ond os oes achubwr bywyd ar y traeth y dylid nofio – gall llanwau cryf a cherhyntau terfol fod yn beryglus. Gwiriwch amserau'r llanw cyn cerdded ym Mhen Pyrod a Bae y Tri Chlogwyn.  

• Gweithgareddau: Defnyddiwch weithredwyr achrededig ar gyfer chwaraeon dŵr a gweithgareddau antur 

• Rhagor o wybodaeth: Byddwch yn gyfrifol ym Mae Abertawe  

Teithio neu aros 

• Cludiant: Cysylltiadau bysus gwych o Fae Abertawe i'r Mwmbwls – cynlluniwch gyda Traveline Cymru 

• Llety: Dewiswch o lety gwely a brecwast clyd ar arfordir y Mwmbwls, bwthyn gwledig ym mhenrhyn Gŵyr neu westy ffasiynol yng nghanol dinas Abertawe